سݨ سمجھ ڑے زاہد جاہد توں
ہن عشق دے اے کلمات عجب
ہے گالھ عجب، ہے حال عجب
ہے چال عجب ہے گھات عجب
ہے ذوق عجب ہے شوق عجب
ہے عین عجب ہے بین عجب
ہے ذکر عجب ہے فکر عجب
ہے نفی عجب اثبات عجب
کل تانگھ طلب مفقود کرن
سبھ صورت حق مسجود کرن
تھی باذل ترکِ وجود کرن
سِک صوم صلوٰۃ زکوٰۃ عجب
حکمات عجب شبہات عجب
درجات عجب درکات عجب
آیات عجب، طاعات عجب
طاغوت تے لات منات عجب
ہک ذاتوں سہنس ذوات عجب
اِسماء، افعال، صفات عجب
خوش خِضر دے فلسفیات عجب
ظلمات تے آبِ حیات عجب
ٹھپ فقہ اصول عقائد نوں
رکھ ملت ابن العربی دی
ہے دلڑی غیروں پاک تری
مصباح عجب مشکوٰۃ عجب
حرکات عجب سکنات عجب
اشغال عجب اوقات عجب
اوراد عجب دعوات عجب
ساعات عجب ڈینہہ رات عجب
لا تدركه الابصار عجب
لا يجحه الاشكال عجب
ہے بحر عجب ہے لہر عجب
ہے نہر عجب قطرات عجب
آفات عجب خدشات عجب
صدمات عجب حسرات عجب
واہ جذبتہ من جذبات عجب
راحات عجب لذات عجب
ناسوت عجب ملکوت عجب
جبروت عجب لاہوت عجب
تلبیس عجب تانیس عجب
تقدیس عجب سطوت عجب
اوہام عجب ابہام عجب
اعلام عجب الہام عجب
ھمزات عجب خطرات عجب
لمحات عجب شطحات عجب
ہے قُرب عجب ہے بُعد عجب
ہے وصل عجب ہے فصل عجب
ہے قہر حجاب عقاب عجب
ہے لطف نجات سبات عجب
ابدال عجب اوتاد عجب
اقطاب عجب افراد عجب
تحقیق عجب تصدیق عجب
تقلید عدول ثقات عجب
ہے قلب عجب ہے سِرّ عجب
ہے نفس عجب ہے روح عجب
ہے حرم عجب احرام عجب
حجاج عجب عرفات عجب
جبریل عجب تنزیل عجب
ترتیل عجب تعمیل عجب
ہے ظہر عجب تفسیر عجب
ہے بطن تے تاویلات عجب
ہے کِبر تے فخر غرور عجب
ہے نار عجب ہے نور عجب
ہے نخل عجب ہے طور عجب
ہے موسیٰ تے میقات عجب
آغاز عجب انجام عجب
ہے شام عجب پربھات عجب
ہے شمس تے مد الظل عجب
ہے عکس عجب ذرات عجب
ہے طرح قیام قعود عجب
ہے وضع رکوع سجود عجب
ہے شفع عجب ہے وتر عجب
ارکان عجب رکعات عجب
نفقات عجب صدقات عجب
خیرات عجب حسنات عجب
ہے دنیا اصل احاد عجب
ہے دین الوف مآت عجب
ہے دوزخ طبقات عجب
ہے جنت سبع صفات عجب
عصیان عجب عصات عجب
ابرارتے باقیات عجب
واللیل ہے رمز بطون عجب
والقلم عجب ہے نون عجب
والتین تے والزیتون عجب
والشمس تے والصّافات عجب
من این الیٰ این است عجب
ماالحاصل فی البین است عجب
من علم الیٰ العین است عجب
اسرار و رموز نکات عجب
گھر بار ڈسے برباراساں
گئے وسر سبھو کم کاراساں
لاچار تے زارنزاراساں
واہ ڈتری برہوں برات عجب
ہک پاسوں ناز نواز عجب
بئے پاسوں عجز نیاز عجب
ہے سوز عجب ہے ساز عجب
ہے گھنڈ عجب ہے جھات عجب
واہ عالم حسن آباد عجب
وچ سوہݨیاں دا بیداد عجب
لٹی دلڑی دی فریاد عجب
مُٹھیاں اکھیاں دی برسات عجب
ہر آن احد ڈوں دھیان دھرو
ہے بے شک دین ایمان ایہو
دل نال فریدؔ دا وعظ سݨو
سو بات دی ہے ہک بات عجب
No comments:
Post a Comment